• O ciclo audiovisual ‘Pantallas Sonoras’, que se celebrará en Burela do 2 ao 5 de setembro de
  2026, estrea un certame dotado con premios en metálico e en especie.
• A programación expande as súas liñas de traballo cunha Selección Oficial de videoclips
  galegos que complementará a proxección de documentais musicais.

Burela, 1 xullo de 2026. A Asociación Cultural Plataforma Ultramar, con base na Mariña Lucense,
anunciou, en colaboración co festival Osa do Mar, a apertura do prazo de inscrición para o seu novo
Concurso de Videoclips. Esta iniciativa enmárcase dentro da programación de ‘Pantallas Sonoras
2026’, un proxecto que articula a intersección entre o cinema, a música, o territorio e a identidade, e
que se desenvolverá en en Burela entre o 2 e o 5 de setembro, complementando a programación do
festival musical.

A gran novidade deste ano supón un impulso estratéxico para a creación audiovisual galega
vinculada á música contemporánea. O concurso concíbese como un escenario de visibilidade e
experimentación estética para novas autorías, asumindo o formato do videoclip máis alá do
estritamente promocional.

Convocatoria aberta ata o 31 de xullo
A convocatoria está dirixida a persoas físicas ou xurídicas que presenten obras producidas a partir do
1 de xaneiro de 2025, cunha duración máxima de 8 minutos. Co obxectivo de potenciar o tecido
cultural propio, as pezas presentadas deben contar cunha vinculación galega significativa, xa sexa
pola súa dirección, produción, localización ou pola orixe do artista ou banda musical principal.
A inscrición é totalmente gratuíta e o prazo permanecerá aberto a través do formulario oficial en liña,
dispoñible na web da Osa do Mar, ata o vindeiro 31 de xullo de 2026 ás 23:59 h.

Tres xurados e un gran evento presencial

O certame contará nesta edición con tres xurados diferenciados que outorgarán as seguintes
distincións: Premio do Xurado Profesional, composto por especialistas do eido audiovisual e
musical, cunha dotación económica de 500 €; Premio do Xurado Fundación Eu Son, composto por
usuarios/as da fundación e cunha distinción en especie; Premio do Público, tamén en especie e
outorgado mediante votación directa polas persoas asistentes á proxección dos videoclips.

O fallo e a entrega de premios terán un carácter marcadamente participativo e espectacular.
Celebraranse a mañá do sábado 5 de setembro dentro do festival Osa do Mar nun único evento
central. Nel, o público poderá gozar da proxección oficial dos videoclips finalistas, emitir o seu voto e
presenciar a posterior entrega de galardóns.

Con esta aposta, máis as futuras confirmacións dos documentais que completarán o ciclo Pantallas
Sonoras 2026, Ultramar consolídase como un nodo que conecta comunidade e territorio a través das
linguaxes audiovisuais musicais máis innovadoras.

Contacto: ultramarmostra@gmail.com / @ultramar_plataforma